மெட்ரோ இரயில் திட்டம் : யாருக்கு இலாபம்?

கோவை, மதுரை மெட்ரோ இரயில் திட்டத்தை நிராகரித்த ஒன்றிய பா.ஜ.க அரசை கண்டித்து மதச்சார்பற்ற முற்போக்குக் கூட்டணிக் கட்சிகளின் சார்பில் 20.11.2025 வியாழக்கிழமை கோவையிலும், 21.11.2025 வெள்ளிக்கிழமை மதுரையிலும் கண்டன ஆர்ப்பாட்டம் நடைபெற்றது.

இந்த ஆர்ப்பாட்டத்தில் பங்கெடுத்துக்கொண்ட அனைத்துக் கட்சியினரும், தமிழ்நாட்டிற்கான ஜி.எஸ்.டி. நிதி ஒதுக்கீடு விஷயத்தில் பாரபட்சம் காட்டுவது, மதுரை எய்ம்ஸ் திட்டத்தை கிடப்பில் போடுவது என தொடர்ந்து பாஜக தமிழ்நாட்டை வஞ்சித்து வருவதன் தொடர்ச்சியாகவே மெட்ரோ இரயில் திட்ட அனுமதி மறுப்பு அறிவிப்பும் உள்ளது என்று கண்டன உரை ஆற்றினர்.

மேலும் கல்வி, ஜிஎஸ்டி நிதிப்பகிர்வு போன்றவற்றில் பாரபட்சம் காட்டினாலும் தமிழ்நாடு முதலமைச்சர் எப்படி கையாண்டு செயல்படுத்தினாரோ அதேபோல் கோவையிலும், மதுரையிலும் மெட்ரோ இரயில் திட்டத்தை செயல்படுத்துவார். இங்கு மெட்ரோ ரயில் வந்தே தீரும் என்றும் கூறினர்.

மாறாக அதிமுக, பாஜக உள்ளிட்ட கூட்டணிக் கட்சியினர், வழக்கம்போல் திமுக உள்ளிட்ட கட்சியினர் இந்தப் பிரச்சினையிலும் அரசியல் செய்கின்றனர் என்றும், கோவை, மதுரை மெட்ரோ இரயில் திட்டம் நிராகரிப்பதற்கு காரணம், திட்ட அறிக்கையில் போதுமான தகவல்களை கொடுக்கவில்லை என்றும் கூறியுள்ளனர்.

மேலும், 2026-ஆம் ஆண்டில் தேசிய ஜனநாயகக் கூட்டணி வெற்றி பெற்ற பின் கோவைக்கு மெட்ரோ இரயில் திட்டத்தைக் கொண்டு வருவோம் என்றும் கூறியுள்ளனர்.

இப்படி ஒருவரையொருவர் போட்டி போட்டுக்கொண்டு வாய்ச்சவடால் அடிப்பது மக்களின் வாக்குகளைப் பெற்று யார் தமிழ்நாட்டின் அடுத்த முதல்வர் ஆவது என்பதை தாண்டி, இந்த திட்டத்தில் அரசியல் முக்கியத்துவம் எதுவுமில்லை.

கோவை தெற்கு சட்டமன்ற உறுப்பினர் வானதி சீனிவாசன், கோவை மெட்ரோ இரயில் திட்ட அறிக்கையில் திமுக அரசாங்கம் குறிப்பிடப்பட்டுள்ள பெரியகடை வீதி, நஞ்சப்பா வீதி போன்ற பகுதிகள் மிகவும் நெரிசலான பகுதிகள் என்பதால் திட்டத்தைச் செயல்படுத்த கடைகளை இடிக்க வேண்டும் என்று கூறியுள்ளார். திமுகவிற்கு வாக்களிக்காத கோவை மக்களை வஞ்சிப்பதற்காகவே இப்படி ஒரு திட்டத்தைக் கொடுத்துள்ளது என்று உள்நோக்கம் கற்பித்தாலும், அதில் பாதிக்கப்படும் மக்களின் வாழ்க்கை குறித்து எந்தக் கட்சியினரும் எப்போதும் சிந்திப்பதும் இல்லை, பேசுவதும் இல்லை.

பா.ஜ.க விவசாய அணி மாநிலத் தலைவர் ஜி.கே.நாகராஜ், மெட்ரோவுக்கு வருமானம் முக்கியம். தி.மு.க-வின் இலவசப் பேருந்தைப்போல, மெட்ரோவிலும் இலவசப் பயணம் என அறிவித்துவிட்டால் யார் பொறுப்பேற்பது என்று கூறியுள்ளார். மாசு குறைப்பு, போக்குவரத்து நெரிசல் குறைப்பு, பயணிகள் வசதிக்காக பொதுப் போக்குவரத்துடன் ஒருங்கிணைப்பு (இரயில் + பேருந்து + மெட்ரோ) — என்று பேசிக்கொண்டு இறாமல், இவை எல்லாவற்றையும்விட பணம் முக்கியம் பிகிலு என்ற உண்மையைக் கூறியுள்ளார்.

இத்தகைய திட்டங்களை நிறைவேற்றினால் மக்களின் ஒரு பகுதியினர் வாழ்வாதாரத்தை இழந்து பாதிக்கப்படுவார்கள் என்று வானதியும், இதில் காசு கொடுத்துத்தான் பயணம் செய்யமுடியும் என்பதால் மக்கள் அனைவரும் பாதிக்கப்படுவார்கள் என்று நாகராஜ்-வும் தெரிவித்துள்ளனர்.

மெட்ரோ திட்டத்தின் மூலம் மக்கள் பாதிக்கப்படுவார்கள் என்பதில் ஆச்சரியம் ஒன்றுமில்லை. ஆனால் வானதி, நாகராஜ் கூறுவதுபோல இது “இந்தியா“ கூட்டணி கொண்டு வருவதால் ஏற்படும் பாதிப்பு அல்ல மாறாக தேசிய ஜனநாயகக் கூட்டணி கொண்டு வந்தாலும் மக்கள் பாதிக்கப்படுவார்கள்.

ஒன்றிய, மாநில அரசுகளின் நிதிப் பகிர்வில்தான் மெட்ரோ இரயில் திட்டம் நிறைவேற்றப்படுகிறது என்று ஊடகங்கள் கூறுகின்றன. ஆனால் இந்த நிதி எங்கிருந்து பெறப்படுகின்றன, எவ்வளவு பணம் வட்டியாக கொடுக்கப்படுகிறது, இதற்கான புரிந்துணர்வு ஒப்பந்தத்தில் என்னென்ன உள்ளன போன்ற விசயங்களுக்கு நடிகர் விஜய் போன்றவர்களுக்குக் கொடுக்கப்படும் முக்கியத்துவத்தில் சிறிதளவு கூட கொடுப்பதில்லை. ஏனென்றால் கட்சிப் பாகுபாடின்றி தனியார்மயம்-தாராளமயம்-உலகமயம் என்ற நவீன தாராளவாத கொள்கைகளை அனைவரும் ஏற்றுக்கொள்கின்றனர். ஊடகங்களும் இதனை ஏற்றுக்கொண்டுதான் மெட்ரோ திட்டத்தினால் மக்கள் பாதிக்கப்படுவதற்கு திமுக அரசு அனுப்பிய திட்ட அறிக்கையில் நிறைய குளறுபடி இருந்ததுதான் காரணம் என்றும், ஒன்றிய அரசு தமிழகத்தை புறக்கணிக்கிறது என்றும் மாறி மாறி எழுதுவதன் மூலம் மக்கள் நவீன தாராளவாத கொள்கைகளுக்கு எதிராக திரும்ப விடாமல் பார்த்துக்கொள்கின்றன.

ஒப்பந்தங்கள், கடனுதவிகள் என்ற பெயரில் நாட்டின் இறையாண்மையைக் பறித்து தனது இலாபத்திற்கான திட்டங்களை மக்களின் தலையில் கட்டி நாட்டைச் சூறையாடுவதுதான் நவீன தாராளவாதம் ஆகும். இந்த நடவடிக்கையை தான் நாட்டின் முன்னேற்றம், மக்களின் வளர்ச்சி என்று ஊடகங்களும், அரசியல்வாதிகளும் கூறி வருகின்றனர். அதற்குச் சாட்சியாக தான் மெட்ரோ இரயில் திட்டம் உள்ளது.

மக்களால் தேர்ந்தெடுக்கப்படும் அரசாங்கம், மக்களுக்கு செய்யவேண்டிய கடமைகளில் இருந்து தங்களை முழுவதுமாக விடுவித்துக்கொள்ள அனைத்து துறைகளிலும் கொஞ்சம் கொஞ்சமாகத் தனியார்மயத்தைப் புகுத்துகிறது. இதன் ஒரு பகுதிதான் மெட்ரோ இரயில் திட்டம் என்பதனைப் புரிந்துகொண்டு நம்மை ஏய்த்துவரும் அனைத்து அரசியல் கட்சிகளையும் புறக்கணித்து, தெருவில் இறங்கிப் போராடுவோம்.