தற்போது தமிழ்நாடு முழுவதும் சிறப்பு தீவிர வாக்காளர் பட்டியல் திருத்தம் (SIR) இந்திய தேர்தல் ஆணையத்தால் மேற்கொள்ளப்பட்டு வருகிறது. இதன்படி, வாக்காளர்கள் அனைவரும், தங்களது குடியுரிமையை நிரூபித்து அதன் மூலம் தங்களது வாக்குரிமையை நிலைநாட்டிக் கொள்ள, ஒரு படிவத்தை பூர்த்தி செய்து தேர்தல் ஆணையத்திடம் ஒப்படைக்க வேண்டும். நவம்பர் 4-ஆம் தேதி தொடங்கி, டிசம்பர் 4-ஆம் தேதிக்குள் அதாவது 30 நாட்களுக்குள் படிவங்களை வாங்கி பதிவேற்றம் செய்யும் வேலையை முடிக்கப்போவதாக தேர்தல் ஆணையம் கூறியிருக்கிறது.

இதற்கென படிவங்கள் கொடுப்பதும், அதனைப் பூர்த்தி செய்து வாங்கும் வேலைகளும் தீவிரமாக நடந்து வருகின்றன. தற்போதைய நிலவரப்படி தமிழகத்தில் உள்ள ஆறு கோடியே 41 இலட்சம் வாக்காளர்களில் சுமார் ஆறு கோடி பேருக்கு, அதாவது கிட்டத்தட்ட 93% பேருக்குப் படிவங்கள் விநியோகித்திருப்பதாகவும் அதில் 22 சதவிகிதப் படிவங்கள் பூர்த்திசெய்யப்பட்டு பதிவேற்றம் செய்யப்பட்டிருப்பதாகவும் இந்தியத் தேர்தல் ஆணையம் அறிவித்திருக்கிறது.

இந்தப் படிவங்களைப் பூர்த்தி செய்வது மிகவும் கடினமாக இருப்பதாக மக்கள் மத்தியிலிருந்து பரவலாக எதிர்ப்பு வரவே, அனைத்து வாக்குச்சாவடி மையங்களிலும் இதற்கென சிறப்பு முகாம் அமைத்து வாக்காளர்கள் அனைவரும் அங்கே வந்து தங்களது படிவங்களைப் பூர்த்தி செய்து கொடுக்கலாம் என தேர்தல் ஆணையம் கூறியிருக்கிறது. மக்கள் தங்களது வேலைகளை விட்டுவிட்டு இந்த படிவத்தை நிரப்புவதற்காக தேர்தல் ஆணையம் அமைத்திருக்கும் இந்த உதவி மையங்களுக்குப் போக நிர்பந்திக்கப்பட்டிருக்கிறார்கள். இந்த உதவி மையங்களுக்கு ஒரு முறை சென்றால் போதும் படிவத்தை நிரப்பிக் கொடுத்துவிடலாம் என்ற நிலை இல்லை. பெரும்பாலான சமயங்களில் தேர்தல் ஆணையம் கேட்கின்ற ஆதாரங்கள் கைவசம் இல்லாத காரணத்தால் மக்கள் அலைக்கழிக்கப்படுவதும், மீண்டும் மீண்டும் உதவி மையங்களுக்குச் செல்ல வேண்டிய நிலை இருக்கிறது.

இந்தச் சூழலில் இயற்கையாகவே மக்கள் மத்தியிலிருந்து சில கேள்விகள் எழுகின்றன.

• தேர்தல் ஆணையம் ஏன் இது போன்ற சிறப்பு தீவிர வாக்காளர் பட்டியல் திருத்தத்தை மேற்கொள்ள வேண்டும், படிவம் கொடுத்து அனைவரையும் பூர்த்தி செய்யச் சொல்ல வேண்டும்?
• இன்னும் சில மாதங்களில் தமிழ்நாடு சட்டமன்றத் தேர்தல் நடைபெறவிருக்கின்ற சூழலில் இப்போது ஏன் இதனைச் செய்ய வேண்டும்?
• எதற்காக வாக்காளர்கள் தேர்தல் ஆணையம் கேட்கின்ற 11 ஆதாரங்களில் ஒன்றை சமர்பிக்க வேண்டும்?
• வாக்காளர் பட்டியல் திருத்தத்தின் போது குடியுரிமையை ஏன் சோதிக்க வேண்டும்?
• இவ்வளவு தீவிரமான வாக்காளர் பட்டியல் திருத்தத்தை இவ்வளவு குறுகிய காலத்திற்குல் (ஓரு மாதத்தில்) முடிக்க வேண்டும் எனக் கூற வேண்டியதன் அவசியம் என்ன?

தமிழக மக்கள் மத்தியிலிருந்து எழும்பியிருக்கின்ற இதுபோன்ற இன்னும் ஏராளமான கேள்விகள் ஏற்கெனவே பீகாரில் எஸ்.ஐ.ஆர். நடைமுறைப்படுத்தப்பட்ட போதே எழுந்தன. அப்போது அதற்குப் பதிலளித்த இந்திய தேர்தல் ஆணையமும், தலைமைத் தேர்தல் ஆணையர் ஞானேஷ் குமாரும் கீழ்கண்ட பதில்களைக் கொடுத்திருந்தனர்.

• சிறப்புத் தீவிர வாக்காளர் பட்டியல் திருத்தம் என்பது புதியதல்ல, அவ்வப்போது நடைபெறுவது. இதற்கு முன்பு 2003-ஆம் ஆண்டிலே கூட இதுபோன்ற தீவிரத் திருத்தம் மேற்கொள்ளப்பட்டது. அப்போதும் கூட இது போன்ற படிவம் கொடுக்கப்பட்டு வாக்காளர்கள் அனைவரும் பூர்த்தி செய்ய வேண்டும் எனக் கூறப்பட்டது.
• 2003-ஆம் ஆண்டு தீவிர திருத்தத்தின் போதும் இதேபோன்று தேர்தலுக்குச் சில மாதங்கள் முன்னதாகத்தான் செயல்படுத்தப்பட்டது. ஒரு மாத காலத்தில் செய்துமுடிக்கப்பட்டது.
• அப்போது 4 ஆதாரங்களில் ஒன்றை தேர்தல் ஆணையம் வாங்கியது தற்போது 11 ஆதாரங்களில் ஒன்றைக் கோருகிறது.
• 2003-இல் நடைபெற்ற தீவிர திருத்தத்தின் போதும் குடியுரிமையை சோதிப்பதை தேர்தல் ஆணையம் செய்தது.
• 2003ல் நடைபெற்ற சிறப்பு தீவிர திருத்தத்தின் போது கொடுக்கப்பட்ட வழிகாட்டுதல்களே தற்போதும் இந்தியத் தேர்தல் ஆணையத்தால் கடைபிடிக்கப்படுகிறது.

இவ்வாறு தலைமைத் தேர்தல் ஆணையர் ஞானேஷ் குமார் கூறியவுடன் 2003-ஆம் ஆண்டு நடைமுறைப்படுத்தப்பட்ட SIR-இன் வழிகாட்டுதல்களைக் கொடுக்குமாறு பலதரப்பிலிருந்தும் கோரிக்கை எழுப்பப்பட்டது. இந்திய தேர்தல் ஆணையத்தின் இணையதளத்திலோ அல்லது வேறு எங்கும் கூட இதனைக் காண முடியவில்லை, பதிவிறக்கம் செய்யவும் முடியவில்லை. 2003-ஆம் ஆண்டு மேற்கொள்ளப்பட்ட SIR-இன் வழிகாட்டுதல்களைக் (Guidelines) கொடுக்கும்படிக் கேட்டு சமூக செயற்பாட்டாளர் சுதா பரத்வாஜ் அவர்கள், தகவல் பெறும் உரிமைச் சட்டத்தின் கீழ் தேர்தல் ஆணையத்திடம் மனுச் செய்தார்.

ஆனால் அதற்கு பதிலளித்த இந்திய தேர்தல் ஆணையம், 2003-இல் கொடுக்கப்பட்ட வழிகாட்டுதல்கள் மின்னணு மென் பிரதியாக இல்லாமல் அச்சிடப்பட்ட வடிவத்தில் இருந்தன என்றும் அவை தற்போது எங்கே இருக்கின்றன என தங்களால் கண்டுபிடிக்க முடியவில்லை என்றும் கூறியது. இருந்த போதும் எஸ்.ஐ.ஆர். குறித்து உச்ச நீதிமன்றத்தில் நடந்த வழக்கில் தற்போதைய சிறப்பு தீவிர திருத்தம் என்பது 2003-ஆம் ஆண்டில் நடத்தப்பட்ட அதே வழிகாட்டுதல்களின் அடிப்படையில்தான் முன்னெடுக்கப்படுவதாக இந்திய தேர்தல் ஆணையத்தின் சார்பில் பிரமாணப்பத்திரம் தாக்கல் செய்யப்பட்டது. அதாவது தங்களிடம் இல்லாத வழிகாட்டுதல்களை அடிப்படையாகக் கொண்டு இந்த நடைமுறையை முன்னெடுப்பதாக தேர்தல் ஆணையம் கூறியிருக்கிறது.

உண்மையில் 2003-இல் நடத்தப்பட்ட சிறப்பு தீவிர திருத்தத்திற்கும், தற்போது நடத்தப்படுவதற்கும் எள் அளவும் ஒற்றுமை இல்லை. இதனை மறைப்பதற்காகவே 2003 வழிகாட்டுதல்களைக் கொடுக்க இந்திய தேர்தல் ஆணையம் மறுத்துவிட்டது.

ஆனால் தேர்தல் ஆணையம் தர மறுத்த 2003-ஆம் ஆண்டு வழிகாட்டுதல்களை, சமூக செயற்பாட்டாளரும், தேர்தல் ஆய்வாளருமான, யோகேந்திர யாதவ் தேடிக் கண்டுபிடித்து வெளியிட்டார். அதன் மூலம் இந்தியத் தேர்தல் ஆணையமும், தலைமைத் தேர்தல் ஆணையரும் கூறியவை அனைத்தும் அண்டப் புளுகு என்பது வெளிச்சத்திற்கு வந்தது.

2003-ஆம் ஆண்டிலும் கூட இதேபோன்று சரிபார்ப்புப் படிவம் கொடுக்கப்பட்டது என்றும் அதனை வாக்காளர்கள் அனைவரும் பூர்த்தி செய்தனர் என்றும் ஞானேஷ் குமார் கூறியது வடிகட்டிய பொய் என்பதை யோகேந்திர யாதவ் ஆதாரத்துடன் அம்பலப்படுத்தினார்.

2003-ஆம் ஆண்டில் இது போன்ற படிவங்கள் எதுவும் கொடுக்கப்படவில்லை. வாக்காளர்கள் அதனைப் பூர்த்தி செய்யவும் இல்லை. அதேபோன்று இத்தனை நாட்களுக்குள் இதனை முடித்துச் சமர்பிக்க வேண்டும் என்று தற்போது விதிக்கப்பட்டிருப்பது போன்ற இறுதிக் கெடுவும் விதிக்கப்படவில்லை. வாக்குச் சாவடி நிலை அலுவலர்கள் (BLO), வீடு வீடாகச் சென்று குடும்பத் தலைவரிடம் வீட்டில் இருப்பவர்கள் குறித்த தகவல்களைப் பெற்று அதன் அடிப்படையில் வாக்காளர் பட்டியலில் திருத்தங்களை மேற்கொண்டிருக்கின்றனர். அதற்குச் சாட்சியாக குடும்பத் தலைவரின் கையொப்பத்தை மட்டுமே பெற்றிருக்கின்றனர். எவ்வித படிவத்தையும் கொடுத்து அதனைப் பூர்த்தி செய்யும்படி கூறவில்லை.

அடுத்ததாக 2003-ஆம் ஆண்டில் 4 ஆவணங்களில் ஒன்றை சமர்ப்பிக்கும்படிக் கேட்டதாகவும் தற்போது அதன் எண்ணிக்கையை 11 ஆக (ஆதார் அட்டையை சேர்க்காமல்) அதிகரித்திருப்பதாகவும், தேர்தல் ஆணையம் கூறியது. ஆனால் 2003-ஆம் ஆண்டில் வாக்காளர்கள் யாரும் எந்த ஆவணத்தையும் சமர்பிக்கும்படி கூறப்படவில்லை. குடும்பத் தலைவரின் கூற்றை மட்டுமே அடிப்படையாக கொண்டு திருத்தம் மேற்கொள்ளப்பட்டிருக்கிறது. முகவரி மாறியவர்கள், ஓன்றுக்கு மேற்பட்ட இடங்களில் பதிந்திருந்தவர்களிடம் மட்டுமே ஆவணங்கள் கோரப்பட்டிருக்கின்றன.

அதேபோல 2003-ஆம் ஆண்டிலும் கூட ஒவ்வொரு வாக்காளரும் தங்களது குடியுரிமையை நிரூபிக்க வேண்டியிருந்ததாகவும் ஆகையால்தான் 2003-இல் வாக்காளர் பட்டியலில் இருந்தவர்கள் யாரும் தங்களுடைய குடியுரிமையை தற்போது நிரூபிக்க தேவையில்லை என ஞானேஷ் குமார் கூறியதும் பொய்தான் என நிரூபணமானது. 2003-இல் கொடுக்கப்பட்ட வழிகாட்டுதல்களில் குடியுரிமையைச் சோதிக்க வேண்டும் என எங்கேயும் கூறப்படவில்லை. இன்னும் சொல்லப்போனால் அந்த ஆவணத்தின் 32-வது பக்கத்தில், குடியுரிமையைச் சோதிப்பது என்பது வாக்காளர் பட்டியலைத் திருத்தம் செய்பவர்களது பணி இல்லை என அழுத்தம் திருத்தமாக கூறப்பட்டுள்ளது.

2003-இல் எந்தவொரு வாக்காளரின் குடியுரிமை மீது இந்திய அரசு சந்தேகம் எழுப்பினால் மட்டுமே அவர் தனது குடியுரிமையை நிரூபிக்க வேண்டும் எனக் கூறப்பட்டுள்ளது.

மொத்தத்தில் 2003-இல் நடந்த சிறப்பு தீவிர வாக்காளர் பட்டியல் திருத்தம் என்பது வீடு வீடாகத் தேடி வந்து, குடும்பத் தலைவரிடம் விசாரித்து அதன் அடிப்படையில் எவ்வித ஆவணங்களையும் சமர்பிக்க வேண்டும் என்று இறுதித் தேதி அறிவித்து கெடு விதிக்காமல், வீட்டில் இருப்பவர்கள், இறந்து போனவர்கள், வீடு மாறிச் சென்றவர்கள் என திருத்தம் செய்து அங்கேயே அப்போதே எல்லாவற்றையும் சரிபார்த்து முடிக்கப்பட்டிருக்கிறது. எந்தவொரு வாக்காளரும் தங்களது குடியுரிமையை நிரூபிக்க வேண்டும் என நிர்பந்திக்கப்படவில்லை.

ஆனால் இப்போது அனைத்து வாக்காளர்களின் வாக்களிக்கும் உரிமையும் பிடுங்கப்பட்டு அவர்கள் ஒரு மாத காலத்திற்குள் படிவம் ஒன்றை பூர்த்தி செய்து கொடுக்க வேண்டும், உங்களது குடியுரிமையை நிரூபிக்க வேண்டும் அதன் அடிப்படையில் மட்டுமே உங்களுக்கு வாக்குரிமை வழங்கப்படும் என்று கூறப்படுகிறது. இதுதான் வழமையான SIR-க்கும் தற்போது நடத்தப்படும் SIR-க்கும் இருக்கும் மிக முக்கியமான வித்தியாசம்.

இதனை மறைத்து வாக்காளர் பட்டியலில் இறந்து போனவர்களது பெயர்களை நீக்குகிறோம், போலி வாக்காளர்களை நீக்குகிறோம். அதற்காக வழக்கமாக நடத்தப்படும் வாக்காளர் பட்டியல் திருத்தத்தைத்தான் தற்போது நடத்துகிறோம் அதனைக் கண்டு ஏன் அஞ்ச வேண்டும் எனக் காவிக் கும்பலும் அதன் அடிமையாக இருக்கும் எடப்பாடி கும்பலும் பொய்ப் பிரச்சாரம் செய்கிறது.

• அறிவு