சாதிவாரிக் கணக்கெடுப்பு அறிவிக்கப்பட்டதை தொடர்ந்து, வன்னிய சாதி இளைஞர்கள் மாநாடு, கடந்த ஞாயிறு அன்று மாமல்லபுரம் அருகில் திருவிடந்தையில் நடைபெற்றது. இம்மாநாட்டை, அப்பா ராமதாசும், பிள்ளை அன்புமணியும் கூட்டாகத் தலைமையேற்று குடும்பம் மற்றும் சாதி சனங்களோடு நடத்தி முடித்துள்ளனர்.

மாநாடு முடிந்த பிறகு அங்கு குவிந்த குப்பைகளை அகற்றும் பணியில் அன்புமணி ராமதாஸ் தனது நிர்வாகிகளுடன் ஈடுபட்டார். அச்சமயம் பத்திரிக்கையாளர்களுக்கு அளித்த பேட்டியில் “தமிழ்நாட்டில் இதுவரை இப்படி ஒரு மாநாடு நடைபெற்றது இல்லை என்று பிதற்றிக் கொண்டார். இத்துடன் இம்மாநாட்டில் 15 லட்சத்திற்கும் மேற்பட்டவர்கள் கலந்துக் கொண்டதாகவும் பறைசாற்றிக் கொண்டார்.

மாநாட்டின் நோக்கமாக, சமூக நீதியை ‘தமிழ்நாட்டின் 69% இட ஒதுக்கீட்டை பாதுகாப்பதாக வலியுறுத்தினார். சாதிவாரிக் கணக்கெடுப்பு சர்வேவை தமிழக அரசு நடத்த வேண்டும். இல்லையேல் மிகப்பெரியப் போராட்டம் நடத்தப் போவதாக எச்சரிக்கையும் விடுத்தனர். வன்னிய சாதி ஆதிக்கப் பகுதிகளில் தலித் மக்கள் மீதான தீண்டாமை வன்கொடுமையை நிகழ்த்தி வரும் இவர்கள்தான், தாழ்த்தப்பட்ட மக்களுக்கு  2% இட ஒதுக்கீடு அதிகமாக தர வேண்டுமென கதையளந்ததோடு, காதில் பூவையும் சுற்றுகின்றனர். அப்பா ராமதாசோ ஒரு படி மேலே போய் வன்னிய சாதி மாநாட்டை நடத்திக் கொண்டு அனைத்து மக்களுக்காகவும் போராடுவதாக சரடு விடுகிறார்.

இத்துடன் சேர்த்து 12 ஆண்டுகளுக்கு பிறகு கூட்டப்படும் இம்மாநாடு கூட்டணிக்காகக் கூட்டப்படுவது அல்ல என்கிறார் அன்புமணி ராமதாஸ். ஆனால், திமுக-வானது, 1962-இல் வெற்றி பெற்ற 50 தொகுதிகளில் 45 தொகுதிகள் வன்னிய சாதி மக்கள் அடர்த்தியாக வாழும் பகுதிகள். 1967-இல் 138 தொகுதிகளில் வெற்றிப் பெற்று ஆட்சி அமைத்ததில் 92 தொகுதிகள் வன்னிய சாதி மக்கள் அதிகமாக வாழும் பகுதிகள். இப்பகுதிகளில் வாழும் வன்னிய சாதி  மக்களின் வாக்குகள் தான் திமுகவை ஆட்சியில் அமரவைத்தது எனக் கதைப்பது ஏன்? வன்னிய சாதி மக்களின் வாக்குகளைக் காட்டி அமைக்கப் போகும் கூட்டணியிடம் சீட்டுக்கான பேரம் நடத்துவதற்கு இல்லாமல் வேறு எதற்கு? நாக்கு வழிக்காவா?

அன்புமணியின் புளுகு மூட்டையை, அப்பா ராமதாசோ, வருகின்ற தேர்தலில் கூட்டணி குறித்து நான்தான் முடிவெடுப்பேன் என்று அவிழ்த்து விட்டார். அன்புமணி ராமதாசின் புளுகு மூட்டையை அவிழ்த்து விட்டதோடு, என்னைத் தவிர வேறு எவருக்குமே கூட்டணி குறித்து முடிவெடுப்பதற்கு தகுதியோ, அருகதையோ இல்லை என்பதை மறைமுகமாக வன்னிய மக்களிடம் விதைத்தும் விட்டார்.

வன்னிய மக்களிடம் ஜனநாயகப் பூர்வமாக விவாதத்தை நடத்தி முடிவெடுப்பதை விடுத்து, தானே முடிவெடுப்பேன் என்ற அறிவிப்பு அதிகாரத் திமிரை தவிர வேறென்ன? வன்னிய மக்களுக்கே ஜனநாயகத்தை வழங்காத இவர்தான் அனைத்து மக்களுக்கும் போராடுவதாகக் கூறுவது எவ்வளவு கேலிக்கூத்தானது என்பது சொல்லாமலே விளங்கும். எப்படி இருப்பினும் இவ்வன்னிய சாதி மாநாடு சாதிய வாக்கு வங்கியைக் காட்டி சீட்டுக்கான பேரம் பேசுவதற்கு நடத்தப்பட்டதே என்பதில் எவ்வித ஐயமும் இல்லை.

• மோகன்